Mpwa wa dada aliyekuwa Rais wa Jamhuri ya Muungano wa Tanzania, Hayati Dkt. John Pombe Magufuli aitwaye Furaha Dominic amewataka baadhi ya Watanzania wanaosema kuwa kuna Timu Magufuli ambayo inaandamwa na Serikali iliyopo madarakani waache mawazo kwani Serikali iliyopo ndio watu walewale aliyowaamini Magufuli na kuwateua.
Furaha amesema hayo wakati akifanya mahojiano na Global TV Online katika kipindi maalum cha Hoja kwa Hoja na kuongeza kuwa maneno hayo yanaiumza familia ya Hayati Magufuli kwani hayana ukweli wowote ndani yake.
“Mimi ukiniuliza, Timu Magufuli wa kwanza ni Mama Samia (Rais wa JMT) kwa sababu ndio mtu wa kwanza kuwekwa na Magufuli kwenye wadhifa wa juu kabisa katika nchi hii. Timu Magufuli wa pili ni Dkt. Mpango (makamu wa Rais wa sasa) alimhangaikia san ahata alipougua.
“Timu Magufuli wa tatu ni Waziri Mkuu, Kassim Majaliwa, watu hawakutegemea kama angekuwa Waziri Mkuu, tayari wapo waliokuwa wamejiandaa na kushona suti, lakini akawa Majaliwa.
“Timu Magufuli mwingine ni CDF (Venance Mabeyo), IGP (Simon Sirro), ndio waliteuliwa na Magufuli na hawajabadilishwa, akina Mwigulu Nchemba (Waziri wa Fedha), huyu Mkuu wa Mkoa (Amos Makalla) aliteuliwa na Magufuli akiwa Mbeya, mimi ukiniuliza timu Magufuli ni hao hao mimi siuo Timu Magufuli, mimi ni Mtanzania.
“Mimi nongea kama Timu Tanzania, kama kuna watu tunatakiwa kuwaangalia ni hawa, huwezi kusema huyu ni timu nyingine wakati anaendeleza mambo ya mtu yuleyule aliyelala. Mama anaendeleza mengi mazuri ya Magufuli, sio kwamba namuunga mkono tu lakini pia ni timu mwenza, anaendeleza yaleyale aliyoyaacha hayati.
“Kuna mambo yanakuja na yanatuumiza sana kama familia, Magufuli alikuwa Rais wa Watanzania, ameshaondoka, kwa nini tumzungumzie mtu asiyekuwepo, tunawaumiza watu waliokuja kumlilia Uwanja wa Mkapa, wapo waliopoteza maisha kwa sababu ya kumpoteza mpendwa wao.
“Hakuna haja ya kuanza kutengeneza Makundi na kumsema mtu aliyeondoka. Magufuli ameondoka na timu yake ambayo ni Timu Mungu, ukiniuliza mimi sasa ni timu gani nitakwambia ni Timu Samia kwa sababu ndiye Rais aliyepo, tumuunge mkono mama,” amesema Furaha.