Nigeria yatinga 16 bora kibabe, yashinda mechi zote

Nigeria wameweka rekodi ya kuwa taifa la kwanza Afrika kushinda mechi zote tatu za hatua ya makundi ya Kombe la Mataifa ya Afrika AFCON 2021 ambayo yanaendelea Cameroon.

Rekodi hiyo imekolezwa na wino mwekundu kufuatia kuibuka na ushindi wa goli 2-0 dhidi ya Guinea-Bissau mchezo uliopigwa dimba la Garoua Cameroon Leo Jumatano Januari 19.

Wakiingia uwanjani wakijua tayari wamefuzu, Nigeria walifanya mabadiliko ya wachezaji nane ambapo bado waliweza kuongoza kupata goli kupitia kwa Umar Sadiq akimalizia krosi maridhawa ya mshambuliaji wa Leicester City Kelechi Iheanacho.

Nahodha William Troost-Ekong aliongeza bao la pili baada ya kazi nzuri ya Moses Simon na kufanya matokeo kuwa 2-0 mpaka dakika 90.

Super Eagles watacheza na best loser kutoka kundi moja wapo kati ya hili B, E au F.