Idadi ya waliofariki katika ibada ya ‘kufunga hadi kufa’ yafika 90

Idadi ya waliofariki katika ibada ya Kilifi imefikia 90 baada ya miili saba zaidi kufukuliwa ikiwa ni pamoja na ya mtoto iliyopatikana katika kaburi moja katika msitu huko Shakahola Jumanne alasiri.

Siku ya Jumanne pekee, miili 17 ilitolewa.

Idadi ya waliofariki, ambayo imekuwa ikiongezeka kwa kasi katika muda wa siku mbili zilizopita huku uchimbaji ukifanywa, inaweza kuongezeka zaidi kwani Shirika la Msalaba Mwekundu la Kenya limesema watu 112 wameripotiwa kupotea kwenye dawati la ufuatiliaji wanaloendesha.

Ibada hiyo iliitwa Good News International Church na kiongozi wake, Paul Mackenzie, alikamatwa kufuatia taarifa iliyodokeza kuwapo kwa makaburi yenye kina kirefu yenye miili ya wafuasi wake 31.

Miili ya watoto ilikuwa miongoni mwa waliofariki.Polisi walisema uchimbaji wa makaburi mengine ili kutafuta miili zaidi unaendelea.

Kiongozi wa kanisa hilo, Paul Makenzie Nthenge yuko rumande, akisubiri kufikishwa mahakamani.

Shirika la utangazaji la KBC lilimtaja kama "kiongozi wa ibada"

Moja ya makaburi hayo inaaminika kuwa na miili ya watu watano wa familia moja - watoto watatu na wazazi wao.

Bw Nthenge amekana kutenda makosa, lakini amenyimwa dhamana. Anasisitiza kwamba alifunga kanisa lake mnamo 2019.

Inadaiwa aliwaambia wafuasi wajinyime kwa njaa ili "kukutana na Yesu".

Gazeti la kila siku la Kenya, The Standard, lilisema wataalamu wa magonjwa watachukua sampuli za DNA na kufanya vipimo ili kubaini iwapo waathiriwa walikufa kwa njaa.

Victor Kaudo wa Kituo cha Haki za Kijamii cha Malindi aliambia Citizen TV "tunapokuwa kwenye msitu huu na kufika katika eneo ambalo tunaona msalaba mkubwa na mrefu, tunajua hiyo inamaanisha zaidi ya watu watano wamezikwa humo".

Waziri wa mambo ya ndani wa Kenya, Kithure Kindiki, alisema ekari zote 800 za msitu huo zimefungiwa na kutangazwa kuwa eneo la uhalifu.

Bw Nthenge alidaiwa kuvipa majina vijiji vitatu vya Nazareti, Bethlehemu na Yudea na kuwabatiza wafuasi kwenye madimbwi kabla ya kuwaambia wafunge, gazeti la The Standard linaripoti.

Kenya ni nchi ya kidini na kumekuwa na visa vya hapo awali vya watu kuvutiwa katika makanisa hatari, yasiyodhibitiwa au madhehebu.