Eng. Hersi: Mayele ndio mshambuliaji namba moja Afrika kwa sasa

Rais wa Young Africans SC, Eng. Hersi Ally Said leo asubuhi amefanya mahojiano na kituo cha televisheni ya taifa Afrika Kusini SABC kwenye kipindi cha Morning Live jijini Johannesburg.

Eng. Hersi amesema hayo wakati akizungumzia kuhusu klabu yake ya Yanga na maandalizi kuelekea mchezo wao wa kesho dhidi ya marumo Gallants.

Rais Hersi amesema kuwa kwa sasa Mayele ndiye mshambuliaji namba moja Barani Afrika kutokana na uwezo wake anaouonyesha kwenye ligi ya ndani na michuano ya Kimataifa.

"Mayele kwa sasa ndiye mshambuliaji bora Afrika, hilo halina kipingamizi, msimu huu anaongoza kwenye ligi yetu akiwa na mabao 16 anayemfuata ana mabao 10, msimu uliopita alimaliza nafasi ya pili na mabao 16, kimataifa mechi za awali msimu huu alifunga mabao 7.

"Kuanzia makundi amefunga mabao matano na ndiye anaongoza kwa mabao pamoja na straika wa Marumo, Ranga Chivaviro. Huu ni msimu wa pili wa Mayeke Yanga lakini tayari ameshafunga mabao zaidi ya mabao 50 akiwa na Yanga. Ni jambo la kujivunia," amesema Hersi.