Alichokisema Rais Mwinyi baada ya Yanga na Kaizer Chiefs kufika Ikulu

Rais wa Zanzibar na Mwenyekiti wa Baraza la Mapinduzi, Dk.Hussein Ali Mwinyi ameushukuru uongozi wa klabu ya Yanga kwa kuileta timu ya mpira wa miguu ya Kaizer Chiefs kutoka Afrika Kusini kuja kutalii Zanzibar.

Ameyasema hayo leo alipokutana na Viongozi na Wachezaji kutoka Timu ya Kaizer Chiefs ya Afrika Kusini waliofika lkulu Zanzibar.

Aidha, Rais Dk.Mwinyi amesema Zanzibar ni nchi ya utalii ikiwemo utalii wa fukwe za bahari na mji mkongwe.

Vilevile, Rais Dk.Mwinyi alieleza kufika kwa Kaizer Chiefs ni fursa ya kuitangaza Zanzibar zaidi Afrika ya Kusini na kimataifa kupitia utalii wa michezo ambayo ni ndoto yake ya muda mrefu.

Naye, Rais wa Timu ya Yanga Injinia Hersi Ally Said amesema kwa juhudi zinazofanywa na Rais wa Zanzibar na Mwenyekiti wa Baraza la Mapinduzi Dk.Hussein Ali Mwinyi katika kukuza utalii wameamua kumuunga mkono kwa kuwaleta Timu ya Kaizer Chiefs yenye historia barani Afrika wafike Zanzibar kutalii na kuitangaza Zanzibar kimataifa zaidi.