Wanne wa familia moja wafariki Dar kwa moshi wa jenereta

Jeshi la Polisi Kanda Maalum ya Dar es Salaam linachunguza vifo vya watu wanne wa familia moja ambao wamepoteza maisha baada ya kuvuta hewa chafu ya moshi kutoka kwenye jenereta walilowasha ndani ya nyumba na baadae kulala.

Kwa mujibu wa taarifa iliyotolewa na Kamanda wa Polisi Kanda Maalumu ya Dar es Salaam Jumanne Muliro, leo imeeleza kuwa tukio hilo limetokea jana Jumatano Aprili 19, 2023 maeneo ya Chang’ombe wilayani Temeke, Jijini Dar es salaam.

Taarifa zilieleza kuwa Aprili 18 saa 4:00 usiku familia hiyo iliwasha jenereta baada ya umeme kuzimika na kuliweka ndani ya nyumba.

Kwa mujibu wa taarifa hiyo imeeleza uchunguzi wa awali unaonesha watu hao walipoteza maisha baada ya kuvuta hewa inayodaiwa kuwa ni hewa chafu ya moshi iliyokuwa inatoka kwenye jenereta baada ya kuwashwa.

Waliopoteza maisha ni Kazija Mohamed (21), Munir Ibrahim (7), Munira Ibrahim (6) Muyyat Ibrahim (3).

Taarifa hiyo imeeleza kuwa mume Ibrahim Juma (28) na mke na Aisha Ayubu (29) wapo katika Hospitali ya Taifa ya Muhimbili wakiendelea na matibabu.

Jeshi la Polisi linaendelea na uchunguzi wa tukio hilo kwa kushirikiana na mamlaka zingine.