Mpiga debe mbaroni kwa tuhuma za kumuua mwenzake

Jeshi la Polisi Mkoa wa Morogoro linamshikilia Abdilah Yassin mkazi wa Kihonda Manispaa ya Morogoro mpigadebe katika kituo kikuu cha mabasi cha Msamvu mkoani Morogoro kwa kusababisha mauaji kwa kumchoma kisu mpigadebe mwenzake Tazani Mndeme mkazi wa Mwembesongo wakigombea abiria.

Kamanda wa Polisi Mkoa wa Morogoro Kamishna Msaidizi wa Jeshi la Polisi (SACP) Fortunatus Musilimu amethibitisha kutokea kwa tukio hilo leo Machi 28, 2022 majira ya saa 12 asubuhi katika stendi hiyo.

Amesema katika ugomvi huo wa kugombea abiria, mtuhumiwa Abdilah Yassin ambaye anafahamika zaidi kwa jina la "HAJIMONGA BONGE" alimchoma kisu kifuani upande wa kushoto Tazani Mndeme ambapo alikimbizwa hospitali ya Rufaa Mkoa wa Morogoro na kufariki wakati akipatiwa matibabu hospitalini hapo.