Lomalisa amvulia Kofia aliemkimbiza Yanga

Aliyekuwa beki wa kushoto wa Yanga, Joyce Lomalisa amempa saluti Chadrack Boka kutokana na kile anachokifanya baada ya kujiunga na Wanajangwani msimu huu.

Boka ndiye aliyeziba nafasi ya Lomalisa ambaye aliachwa na klabu hiyo na kwenda kujiunga na Sagrada Esperanca ya Angola, alikiri mbadala wake katika kikosi cha Wanajangwani anajua.

Lomalisa alisema ingawa siyo mfuatiliaji wa Ligi Kuu Bara, haimanishi hajui uwezo wa Boka ambaye amekuwa mchezaji muhimu katika kikosi cha kwanza Yanga.

“Boka ni beki ambaye alisajiliwa baada ya mimi kumalizana na Yanga. Ni mchezaji mzuri, anajituma na naamini kiwango chake kinamsaada mkubwa kikosini,” alisema Lomalisa.

Aliongeza, “hadi Yanga inamsajili ilishauona uwezo wa Boka na amelithibitisha hilo katika mechi alizo-cheza.” Msimu uliopita ambao Lomalisa alikuwa Yanga alitoa asisti mbili, akicheza mechi 17 na alikuwa na kadi moja ya njano.

Lomalisa alisema kila mchezaji anapaswa kuandika rekodi yake kulingana na aina yake ya uchezaji.

“Binafasi naamini Boka ataacha kitu cha kukumbukwa na Yanga kama ninavyopambana huku niliko ili niweze kuacha rekodi yangu,” alisema.

“Mchezaji hana makazi ya kudumu usije ukashangaa ukaniona tena katika ligi ya Tanzania, hayo ndio maisha ya mchezaji, leo yupo huku kesho kule.”

Hadi sasa Boka kacheza mechi sita, ana kadi mbili za njano, kacheza faulo sita, uwezo wake uwanjani umekuwa kishawishi kikubwa cha kocha Miguel Gamondi kuamini kwamba ni mchezaji muhimu kikosini.