Zamoyoni Mogella afunguka kinachowasibu wachezaji wa Simba

Mchezaji wa zamani Simba SC, Zamoyoni Mogella amesema kuwa wachezaji wa timu hiyo wamekosa hali ya kujiamini ndiyo maana wamekuwa wakipoteza michezo mingi hivi karibuni.

Mogella amesema hayo baada ya Simba kukubali kichapo cha bao 2-1 kutoka kwa wapinzani wao Yanga SC juzi Jumamosi, Aprili 20, 2024 katika Dimba la Benjamin Mkapa.

"Wachezaji Simba SC wamepoteza hali ya kujiamini kwa kuwa Young Africans ni bora kwa sasa na kutokana na hilo walijikuta wakikosa nafasi nzuri za kufunga hasa kipindi cha kwanza na ambazo kama wangefanikiwa kuzitumia, wangewaweka Young Africans kwenye wakati mgumu wa kushinda mechi hiyo.

"Simba SC hawana cha kufanya kwa sasa kushinda ubingwa. Wajipange kwa msimu ujao, kwa jinsi ilivyo na ubora wa Young Africans sio rahisi kupoteza mechi nyakati kama hizi na zaidi wako mbele kwa tofauti ya pointi nyingi," amesema Zamoyoni Mogella.