Kocha wa Polisi Tanzania, Mwinyi Zahera
Kocha Mkuu wa Polisi Tanzania, Mwinyi Zahera amesema mchezo wao dhidi ya Mtibwa Sugar utakuwa kama fainali kwa kuwa ndiyo umebeba matumaini yao ya kubaki Ligi Kuu.
Maafande hao watakuwa nyumbani Uwanja wa Ushirika Moshi mkoani Kilimanjaro Mei 15, kucheza na Mtibwa Sugar mchezo ambao unatarajiwa kuwa na ushindani mkali kutokana na timu zote mbili kuwa katika nafasi mbaya kwenye msimamo.
Kocha huyo ameeleza kuwa ushindi walioupata kwenye mchezo uliopita dhidi ya Ihefu FC umeamsha ari ya kupambana kwenye kikosi chake hivyo anaamini kwa maandalizi waliyofanya hata mchezo ujao watachukua alama tatu.
“Ni mchezo muhimu kwetu, najua utakuwa mgumu lakini naamini tutapata ushindi ambao utasaidia kujiweka angalau kwenye play off na siyo kushuka daraja moja kwa moja,” amesema Zahera.
Kocha huyo ameeleza kuwa yeye na wasaidizi wake wataendelea kupambana kuwapa mbinu mbadala wachezaji wao ili kutimiza lengo lao la kuinusuru timu hiyo kwa kupata ushindi kwenye michezo iliyobaki.
Kocha huyo kutoka DR Congo amesema kwa namna ushindani ulivyo kwa sasa uwezekano wa kujinasua moja kwa moja na janga la kushuka daraja ni ngumu kwa hiyo wanapambana ili kuangukia kwenye Play Off na baada ya hapo watajipanga kucheza michezo ya mtoano.
Polisi Tanzania ipo nafasi ya 15 kwenye msimamo wa Ligi Kuu Tanzania Bara ikiwa na alama 22 na imebakiwa na michezo mitatu kumaliza msimu huu 2022/23.