Mashabiki wa Yanga
Uongozi wa Klabu ya Yanga umewapongeza mashabiki zake waliojitokeza katika Dimba la Mkapa jana Jumapili, Februari 19, 2023 kuipa sapoti timu yao wakati ikicheza na miamba wa soka nchini Congo DR, TP Mazembe.
Katika mchezo huo wa mkondo wa pili wa kundi D Kombe la Shirikisho Afrika, Yanga iliibuka na ushindi wa bao 3-1, mabao yakifungwa na Kennedy Musonda, Mudathiri Yahya na Tuisila Kisinda wakati bao la Mazembe likifungwa na Alex Ngonga.
Tangu mwanzo mpaka mwisho wa mchezo huo, mashabiki wa Yanga walikuwa wakiwapa hamasa wachezaji wao kwa kushangilia kwa nguvu na kuwapa morali hali iliyowaongezea nguvu na kujituma zaidi kupata matokeo hayo.
"Shukrani kwa Wanachama, Mashabiki na Wapenzi wa Young Africans SC kwa kujitokeza kwa wingi kwenye mchezo wetu wa kimataifa dhidi ya TP Mazembe kwenye Dimba la Benjamin Mkapa jana. Hakika ushindi wa jana ni Heshima kwetu, Klabu yetu na Taifa kwa ujumla."
