Yanga
Tuko kamili kuendeleza heshima! Hayo ni maneno ya Yanga kuelekea mchezo wa Ligi Kuu ya NBC Tanzania Bara dhidi ya Azam FC utakaochezwa kesho kwenye Uwanja wa Benjamin Mkapa jijini Dar es Salaam.
Meneja wa Yanga, Hafidh Saleh, amesema wachezaji wa timu hiyo wanaendelea vyema na wako tayari kupambana kwa ajili ya kuondoka na ushindi katika mchezo huo.
Saleh amesema kila mchezaji wa Yanga anafahamu umuhimu wa mechi hiyo na wamejiandaa kuendelea kuwapa furaha wanachama na mashabiki wao.
"Malengo yetu ni kutwaa ubingwa, na ili uwe bingwa ni lazima upate pointi nyingi, tunahitaji ushindi ili tuendelee kujiimarisha katika msimamo wa ligi, tunajua haitakuwa mechi rahisi kwa sababu wenzetu pia wamejipanga na wana kikosi imara," Saleh amesema.
Yanga ndio vinara wa ligi hiyo inayoshirikisha timu 16, ikiwa na pointi tisa sawa na Polisi Tanzania wakati watani zao na mabingwa watetezi Simba wenye pointi saba wako katika nafasi ya tatu kwenye msimamo.
Kikosi hicho cha Kocha Mkuu, Nasreddine Nabi kimekaa kileleni kwa sababu ya kuwa na uwiano mzuri wa mabao ya kufunga, imetikisa vyavu za wapinzani mara nne na haijaruhusu bao kwenye lango lake.
Yanga ndio ilikuwa ya kwanza kwa upande wa timu za Tanzania Bara kuondolewa kwenye mashindano ya kimataifa kwa kukubali kichapo mara mbili kutoka kwa Rivers United ya Nigeria.