Yanga yakomaa na Fei Toto
Klabu ya Yanga imesema kuwa iwapo mchezaji wao, Feisal Salum Abdallah ‘Fei Toto’ anataka kuondoka klabuni hapo basi afuate sheria, taratibu na matakwa ya mkataba wake badala ya kukurupuka kufanya mambo ambayo hayapo kimakubaliano.
Hayo yamesemwa leo Jumatano, Aprili 12, 2023 na Ofisa Mtendaji Mkuu wa Klabu hiyo, Andre Mtine mara baada ya shauri la fei kuomba kuvunja mkataba na Yanga kushindwa kusikilizwa na TFF kufuatia klabu yake kuepeleka pingamizi la ombi lake.
“Tutarudi tena hapa Mei 4, 2023, hivyo ndivyo mamlaka za kisheria zilivyotuelekeza. Tulikuja kusikiliza tulichoitiwa, lakini TFF imeamua ilivyoamua, tutarudi tena.
“Sisi kama Yanga tunachokisema, mchezaji afuate taratibu an matakwa ya mkataba wake.
“Kama anataka kuondoka kwenye klabu ni rahidi tu, iambie klabu nataka kwenda kwa maandishi, tutakubaliana na ataruhusiwa kuondoka. Hatuwezi kufanya vitu ambavyo vipo nje ya mkataba, hiyo haiwezekani,” amesema Mtine.
Fei Toto aliongozana na wakili wake Fatma Karume ambaye baada ya kumaliza kusikilizwa leo amesema kuna vitu vya kisheria vinatakiwa kuwasilishwa Aprili 18 na 25 na Mei 4 ndipo rasmi shauri litasikilizwa tena.
Sehemu ya barua inayotajwa kuandikwa na Feisal Salum kwenda TFF akihitaji kuvunja mkataba na Yanga. Amesema amepitia manyanyaso Jangwani na anaomba akacheze kule anapothaminiwa.
