Yanga yakaa nafasi ya pili kwenye msimamo, yamsubiri Simba kesho!

Yanga wamedhihirisha kwamba wao ni wakubwa baada ya kuishushia mvua ya magoli 3-0 Geita Gold FC.

Mechi ilikuwa live ndani ya dimba la CCM Kirumba jijini Mwanza ambapo magoli ya Pacome, Azizi Ki na Max yalitosha kuwazamisha Geita na kuwaapa ujumbe kwamba wasiwazoee, wao ni timu kubwa.

Awali, Geita waliingia kwenye mchezo huo kwa kuwaacha Yanga wacheze wao wakikaa nyuma kwenye eneo lao mbinu ambayo iliwasaidia walau kwa dakika 40 za mchezo kabla koki ya magoli haijafunguliwa na watu kuanza kujipigia kama ngoma.

Yanga wamekaa nafasi ya pili chini ya Azam FC wenye alama 13 kwenye msimamo wa Ligi Kuu ya NBC wakiwa na alama 12 wote wamecheza michezo mitano wakimsubiri Simba SC naye abalansi msimamo kesho kwa kucheza mechi ya tano wakati kwa sasa anazo alama 12 akizidiwa magoli ya kufunga na kufungwa na Yanga.