Yanga wakutana na bonge la baridi Tunisia

Ofisa Habari wa Klabu ya Young Africans, Ali Kamwe amesema kuwa hali ya hewa waliyokutana nayo nchini Tunisia ni nyuzi joto 10 ikiwa ni tofauti kabisa na Dar es Salaam.

”Hali ya hewa ni baridi kweli kweli ni nyuzi joto 10 inasoma, unaweza ukaona kwa mtu ambaye ametoka Tanzania ambapo ni nyuzi joto 30 kubadilisha haraka, utaweza kuona hali ya hewa ilivyokuwa baridi kweli kweli.”

”Lakini nashukuru Mungu tuna makoti mazito ambayo kila mmoja aliyekuja ameyavaa na hakuna shida yoyote ya hali ya hewa ambayo tunapata kwa sasa hivi. Hii ni sababu moja wapo ya Uongozi wa Klabu ya Yanga kuja kuweka kambi mapema.”

Kamwe amesema na hiyo ndiyo sababu ya Uongozi wa timu hiyo kwenda kuweka Kambi yake mapema Tunisia.

Yanga wapo nchini Tunisia kwaajili ya kucheza mchezo wake wa kwanza wa Michuano ya Kombe la Shirikisho Barani Afrika dhidi ya US Monastir Jumapili ya Februari 12, 2023.