Yanga kulipa kisasi kwa Benchikha?

Huenda Yanga ikakutana tena na Abdelhak Benchikha aliyekuwa Kocha Mkuu wa USM Algers ya Algeria aliyewapora Kombe la Shirikisho Afrika.

Jana Alger ilitoa taarifa ya kuachana na kocha huyo kupitia mtandao wake wa kijamii huku sababu zikiwa hazijawekwa wazi na tetesi zinadai kuwa huenda akajiunga na CR Belouzdad ya Algeria ambayo pia imetoka kumtimua Kocha Mkuu, Sven Vandenbroeck.

Belouzdad ipo kundi moja na Yanga kwenye Ligi ya Mabingwa Afrika ikiwa na Al Ahly (Misri) na Medeame ya Ghana.

Kama Benchikha atajiunga na Waarabu hao basi itakuwa mechi za kisasi watakapokutana na Yanga wakitaka kuutoa unyonge mbele ya kocha huyo ambaye aliitoa Yanga kwa sare ya mabao 2-2 na kutwaa ubingwa kwa bao la ugenini.

Kocha huyo mbali na kutimuliwa Algers lakini aliipa mafanikio makubwa ikiwemo kuifunga bao 1-0 Al Ahly ambayo ni timu bora kabisa Afrika na kuchukua ubingwa wa CAF Super Cup mwanzoni mwa msimu huu.

Baada ya kuachana na timu hiyo, vyombo ya habari zimekuwa zikimhusisha na nafasi hiyo ya kutua Belouzdad wiki hii akiwa anatajwa kati ya makocha bora Afrika.

Hii pia itakuwa nafasi kwa Yanga ambayo tayari ilishaona mbinu za kocha huyo kwenye mchezo wa fainali, ingawa makocha wote waliokuwepo wakati ule kwa sasa hawapo.

Huu utakuwa mchezo wa kwanza kwa Yanga kuvaana na Waalgeria hao kwenye Kundi D la michuano hiyo mikubwa barani Afrika.