Yanga hawapoi, baada ya Skudu chuma kingine kushuka leo

Klabu ya Yanga imesema bado haijamaliza usajili wake wa wachezaji wa kimataoifa msimu huu kwani leo kitashuka chuma kingine tena.

Hayo ameyasema Ofisa Habari wa Klabu ya Yanga, Ally Kamwe baada ya utambulisho wa Mahlatse Makudubela, maarufu kama Skudu kutoka Marumo Gallants ya Afrika Kusini.

“Niwaambie mashabiki wa Yanga, ngoma bado, leo tena tunakwenda kushusha chuma kingine, tunataka tuhakikishe siku ya wananchi pale Benjamin Mkapa watu wanakuja ku-enjoy soka kutoka kwa wachezaji wakubwa Afrika.

“Hatijawahi kuwa na masihara. Safari hii tunataka tufike mbali zaidi Champions League, tunataka tuendeleze ufalme wetu wa ndani. Ndio maana tumeamua kusajili wachezaji bora na leo tunashusha mashine bora kwenye nafasi yake.

“Sisi tunaizunguka Afrika kutafuta wachezaji bora, na leo tunakwenda kutangaza mchezaji bora kutoka kwenye hiyo ligi aliyotoka, maana yake ni chuma juu ya chuma,” amesema Kamwe.