Yanga hawana wakabaji - Mchambuzi

Mchambuzi wa masuala ya soka nchini kutoka East Africa radio, Samwel Rashid mwenyewe anajiita Wakanda Republic amesema kuwa kikosi cha Yanga licha ya kucheza vizuri lakini hawana wakabaji wazuri hivyo ikitokea siku wakakutana na timu nzuri wanaweza kufungwa mabao mengi sana.

Samwel Rashid amesema hayo kufuatia mwendelezo wa Yanga kugawa dozi ya mabao matano matano katika mechi tatu mfululizo ambazo wamecheza huku mashabiki na baadhi ya wachambuzi wakikifagilia kikosi hicho kinachonolea na Kocha Gamondi.

"Ukiangalia kikosi cha Yanga wachezaji wengi ambao wanaanza kwenye kikosi cha kwanza, ukitoa ile High-Pressing, timu ikishapoteza mpira ukawa kwenye zone yao timu inakuwa na wakabaji wachache, haina wakabaji wengi yaani wale "Pure wakabaji", mwangalie Lomalisa Obviously sio mkabaji, ni mchezaji mzuri akiwa offensive.

"Hii hatujaiona sana kwa sababu wapinzani wake wengi wameshindwa kuivuka ile safu ya kiungo, kwa sababu safu ya kiungo ya Yanga ni bora sana, ikitokea wakapata mpinzani ambaye muda mwingi atakuwa anawapa challenge kwenye eneo lao, tunaweza tukaja tukayaona siku moja haya mapungufu kwa Yanga," amesema Samwel Rashid.