Yanga: Tunamtaka Pyramids nusu fainali

Uongozi wa Yanga umeweka wazi kuwa utapambana kwa hali na mali kupata ushindi kwenye mechi mbili za hatua ya robo fainali huku wakitaka kukutana na Pyramids ya Misri katika hatua ya nusu fainali.

Yanga inayonolewa na Kocha Mkuu, Nasreddine Nabi imetinga hatua ya robo fainali baada ya kuongoza kundi D la Kombe la Shirikisho Afrika ikiwa na pointi 13 kwenye droo iliyochezeshwa nchini Misri imewakutanisha na Rivers United ya Nigeria.

Yanga itaanza ugenini mchezo unaotarajiwa kuchezwa kati ya Aprili 21-23, Nigeria na ule wa pili unatarajiwa kuchezwa Uwanja wa Mkapa kati ya Aprili 28-30.

Ally Kamwe, Ofisa Habari wa Yanga amesema kuwa kutinga hatua ya robo fainali ni malengo yao na wanahitaji kushinda ili kufika hatua ya nusu fainali watafurahi ikiwa watakutana na Pyramids.

“Wanasema tumefurahi kukutana na Rivers United baada ya kushangilia? Hilo halitupi tabu na tupo tayari kukutana na mpinzani wetu tunajipanga kupata ushindi dhidi ya Rivers na tukitoka hapa tunataka tukutane na Pyramids katika hatua ya nusu fainali.

“Kwenye hatua ya mtoano mpinzani ambaye amefika hatua hii sio mdogo na wala sio wa kumbeza, hivyo tunaamini kwamba Rivers wapo imara lakini wanakuja tukiwa nasi tupo imara hivyo tunaamini wachezaji watacheza kwa umakini kupata matokeo mazuri.”

Ikiwa Yanga itashinda kwenye hatua ya robo fainali itakutana na mshindi wa mchezo kati ya Pyramids ama Marumo Gallants ambapo Pyramids inapewa nafasi ya kutusua hatua ya nusu fainali.