Yanga: Simba msijidanganye

Mashabiki wa Yanga wameapa kuwa kamwe Simba hawawezi kutangaza ubingwa kwao hivyo leo afe kipa, afe beki ushindi lazima.

Simba atakuwa mwenyeji dhidi yaYanga leo Julai 3 kwenye uwanja wa Benjamin Mkapa katika mchezo wa Ligi Kuu Bara utakaoanza saa 11:00 jioni.

Shabiki wa Yanga kutoka Tawi la Tandale Kidali Asilia, Yusta amesema Simba hatangazi ubingwa kwao kwani hana uwezo huo.

"Kwanza ubingwa wao wa kubebwa halafu leo tukutane anifunge thubutuu, yaani leo Simba hawatoki.

"Tunajua wamepanga kutangaza ubingwa kwetu lakini waandike maumivu kwa ni lazima tuwachape mabao matatu kwa sababu Leo tarehe tatu," amesema Yusta.

Naye shabiki mwingine aliyejitambulisha kwa jina moja la Emmy amesema bao moja tu leo linatosha kuharibu sherehe za ubingwa za Simba.

"Yaani hao Simba wazionee hizo hizo timu nyingine lakini kwa Yanga lazima wakae leo.

"Hawatuwezi kwa lolote ,iwee kiwango uwanjani na hata pesa tunazo,sasa waje uwanjani tuko tayari kwa mapambano na watakiona cha moto,"amesema Emmy.

Shabiki mwingine, Ally Mohammed amesem Simba hana uwezo wa kuwafunga kwani Yanga ndio baba lao.

"Sawa wana nafasi kubwa ya ubigwa lakini hatuwezi kuruhusu watangaze ubingwa kwetu yaani kama wana mawazo hayo wayafute maana leo tutawapigia soka ambalo hawajawahi kuliona yaani hawataamini macho yao.

"Yaani yule Onyango namhurumia sana  sijui kama leo hatapelekwa Muhimbili kwa tatizo la nyonga maana Tuisila Kisinda yuko fiti, Yacouba ndio kawa wa moto balaa,bora wasilete timu uwanjani, " amesema Mohammed.

Imeandikwa na Oliver Albert, Eliya Solomoni na Daud Elibahati