Yanga Princess mambo bado magumu

Licha ya kumtimua Kocha Mkuu, Sebastian Nkoma, mambo bado si shwari kwa Yanga Princess ambapo furaha bado haijarejea baada ya leo kuangukia tena pua kwenye Ligi Kuu ya Wanawake.

Timu hiyo ambayo kwa sasa inanolewa na Fredy Mbuna imekubali kichapo cha bao 1-0 ugenini mbele ya Alliance Girls kwenye mchezo wa Ligi hiyo ambao umepigwa leo kuanzia saa 10 jioni katika Uwanja wa Nyamagana, Mwanza.

Bao pekee la ushindi kwa Alliance Girls limefungwa na Elizabeth John mnamo dakika ya 20 kwa mpira wa juu ambao ulidhaniwa unatoka nje ya lango lakini ukazama wavuni.

Kichapo hicho ni mwendelezo wa matokeo mabovu kwa Yanga Princess katika ligi hiyo ambapo imefikisha mchezo wa nne mfululizo bila kupata ushindi.

Katika mechi hizo nne, Yanga Princess ililazimishwa sare ya 0-0 na vibonde Mkwawa Queens, ikafungwa 1-0 na Fountain Gate Princess, ikalazimishwa sare ya 1-1 na Simba Queens na leo kuchapwa 1-0 na Alliance Girls.

Sasa, Yanga Princess inabaki kwenye nafasi ya nne na pointi zao 22 katika michezo 13 na kuzidi kujiweka pagumu kwenye mbio za ubingwa wa Ligi Kuu, huku Alliance Girls ikifikisha pointi 20 na kukaa katika nafasi ya tano.

Baada ya kushinda leo, Alliance Girls imelipa kisasi cha kufungwa mabao 5-2 katika mchezo wa mzunguko wa kwanza uliopigwa Uwanja wa Uhuru, Dar es Salaam.

Hadi sasa ni Simba Queens pekee ambayo imepata ushindi msimu huu katika Uwanja wa Nyamagana dhidi ya Alliance ambapo ilishinda mabao 4-0.

Tangu kupanda Ligi Kuu Yanga Princess imeshindwa kupata ushindi katika Uwanja wa Nyamagana Mwanza, ambapo mchezo wa mwisho uliopigwa Juni, 2022 timu hizo zilimaliza kwa sare ya 1-1.