Yanga, Azam Zaingilia Usajili wa Simba

WAKATI Simba SC ikitajwa kuwa karibu zaidi kuipata saini ya mshambuliaji wa Zanaco FC, Moses Phiri, imeelezwa kuwa Yanga na Azam zimeingilia dili hilo.

Mshambuliaji huyo ambaye aliwatesa Yanga katika mchezo wa kirafiki katika kilele cha Wiki ya Mwananchi, ameonekana kuwa lulu kwa timu mbalimbali hapa nchini.

Hivi karibuni, ilielezwa kwamba, Phiri usajili wake ndani ya Simba unakuja baada ya timu hiyo kuwa na mpango wa kuachana na nyota mmoja wa kimataifa, Duncan

Nyoni raia wa Malawi na nafasi yake kuchukuliwa na Mzambia huyo.

Chanzo chetu kutoka Zambia kilicho karibu na mchezaji huyo, kimesema kwamba, baada ya Simba kuonekana kuwa siriazi katika usajili wa nyota huyo, Yanga na Azam nao wameibuka.

“Unajua Phiri awali alikuwa anatakiwa na Yanga, lakini alishindwa kujiunga nao kwa sababu viongozi wa Yanga walitaka kumpa mkataba wa awali, kisha asajiliwe baadaye kitendo ambacho mwenyewe alikataa.

“Sababu kubwa ya kukataa mwanzo ni kwamba aliwaambia hawezi kusaini mkataba huo kwani inaweza kutokea timu na dau kubwa zaidi ikamfunga kusaini.

“Akawaambia wasubiri mpaka dirisha dogo ambapo mkataba wake utakuwa umebaki muda kidogo kabla ya kumalizika ili wafanye dili. Usajili wenyewe wa dirisha dogo huko Tanzania unakaribia, hivyo lolote linaweza kutokea.

“Mbali na Yanga, hivi karibuni baada ya kutoka taarifa kwamba Simba wanamtaka Phiri, kuna kiongozi mmoja wa Azam alimpigia simu mchezaji na kumuuliza kama kweli anakwenda Simba, akamwambia bado. Hivyo nao wanamtaka,” kilisema chanzo hicho.

Alipotafutwa mchezaji mwenyewe kuhusiana na hilo, alisema: “Ni kweli timu tatu za Tanzania zinanitaka, chochote kikitokea nitakujulisha lakini mpaka sasa bado hakuna sehemu niliyosaini.”