Xabi noma, Kane balaa!
Xabi Alonso na chama lake la Bayer Leverkusen wana jambo lao mwaka huu. Wameboresha rekodi yao ya kucheza mechi nyingi zaidi za michuano yote bila ya kupoteza kufikia mechi 38 na sasa zikiwa zimebaki mechi nane Ligi Kuu ya Ujerumani kumalizika, wanahitaji kushinda mechi tano tu kutwaa ubingwa wao wa kwanza wa Bundesliga katika historia yao.
Hiyo ni baada ya wikiendi iliyopita kushinda kwa tabu mabao 3-2 dhidi ya timu inayoshika nafasi ya tisa katika msimamo ya Freiburg.
Timu hizo mbili zilikutana zote zikitokea kupata matokeo tofauti katika mechi zao za Alhamisi za hatua ya 16-Bora ya Europa League.
Wakati Leverkusen ya kocha Alonso ilishinda kimiujiza 3-2 nyumbani dhidi ya Qarabag na kutinga robo fainali kwa jumla ya mabao 5-4, Freiburg ilitoka kula kichapo cha mbwakoko cha mabao 5-0 kutoka kwa Wet Ham na kutolewa katika michuano hiyo inayofuata kwa ukubwa Ulaya baada ya Ligi ya Mabingwa.
Unaambiwa ilikuwa miujiza hasa. Yaani wakati inaingia dakika ya 90, Leverkusen ilikuwa nyuma kwa mabao 2-1 dhidi ya Qarabag, lakini katika dakika za majeruhi mshambuliaji wa Czech, Patrick Schick -- ambaye pia alifunga bao la dakika za ‘jiooni’ katika mechi ya kwanza na kuipa timu yake sare ya 2-2 – akafunga tena katika dakika za jioni za 93 na 98 na kuipeleka Leverkusen robo fainali.
Na baada ya kuifunga Freiburg 3-2 juzi, Leverkusen sasa inaangalia kushinda mechi tano zijazo ili itangaze ubingwa wake wa kwanza wa ligi tangu klabu hiyo ianzishwe miaka 120 iliyopita.
Mechi 5 zijazo za Leverkusen ni nyumbani dhidi ya Hoffenheim (Machi 30), ugenini vs Union Berlin (Aprili 6), nyumbani vs Werder Bremen (Aprili 14), ugenini vs Borussia Dortmund (Aprili 21) na nyumbani vs VfB Stuttgart (Aprili 27).
Hata hivyo, Alonso na chama lake wanaweza kutwaa ubingwa mapema zaidi kabla ya Aprili 27 kama tu Bayern Munich ambayo wameizidi kwa pointi 10 itaangusha pointi na yenyewe kushinda zake. Bayern mechi ijayo itacheza na mahasimu wao wa jadi, Borussia Dortmund Machi 30.
Lakini kampeni za ubingwa na kucheza mechi nyingi bila ya kupoteza za Leverkusen zitakutana na mtihani mzito itakapoivaa West Ham katika mechi zao mbili za robo fainali ya Europa League Aprili 11 na 18.
KANE, MUSIALA WAMOTOO Bayern iliendelea kupata matokeo manono dhidi ya timu za mkiani ikiichapa Darmstadt 5-2 Jumamosi ikitoka kuichakaza Mainz 8-1 wiki iliyotangulia.
Harry Kane alifunga bao moja na kuandika rekodi ya kuwa mchezaji wa kwanza katika historia ya Bundesliga kufunga mabao 31 katika msimu wake wa kwanza katika ligi hiyo.
Huku wakibakisha mechi nane msimu kwisha, Kane pia ameingia katika Top 8 ya wachezaji waliofunga mabao mengi zaidi katika msimu mmoja wa Bundesliga akifukuzia rekodi ya muda wote inayoshikiliwa na Robert Lewandowski aliyefunga mabao 41 msimu wa 2020-21.
Bayern ambayo imepangwa dhidi ya Arsenal katika mechi yao ya robo fainali ya Ligi ya Mabingwa Ulaya, katika ushindi wa wikiendi ilimshuhudia kinda wake Jamal Musiala akiweka rekodi ya Bundesliga ya kupiga chenga (dribble) 11 kimafanikio katika mechi moja na huku akifunga mabao mawili na kutoa asisti moja wakiilaza timu inayoshika mkia ya Darmstadt 5-2.