Waziri Ndumbaro ajiuzulu cheo TFF

Waziri wa Utamaduni, Sanaa na Michezo, Mheshimiwa Dk. Damas Ndumbaro amejiuzulu uenyekiti wa Kamati ya Rufani ya Leseni za Klabu ya Shirikisho la Mpira wa Miguu Tanzania (TFF).

Katika barua yake kwa Rais wa TFF, Mheshimiwa Waziri alisema kutokana na wadhifa wake mpya inamlazimu kujiuzulu wadhifa huo.

Alisema amelazimika kujiuzulu nafasi hiyo ili atekeleze majukumu aliyopewa kwa haki na kuepusha mgongano wa maslahi.

Agosti 30 mwaka huu, Rais wa Jamhuri ya Muungano wa Tanzania, Mheshimiwa Samia Suluhu Hassan alimteua Dk. Ndumbaro kuwa Waziri wa Utamaduni, Sanaa na Michezo.