Waziri Mkuu atinga kambi ya stars, wachezaji waahidi makubwa

Waziri Mkuu, Kassim Majaliwa ametembele kambi ya wachezaji wa timu ya taifa, Taifa Stars kuelekea mchezo wa Kundi J kufuzu Kombe la Dunia dhidi ya Jamhuri ya Kidemokrasia ya Kongo (DRC) Novemba 11 Uwanja wa Benjamin Mkapa Jijini Dar es Salaam.

Waziri Mkuu amewahamasisha wachezaji hao kujituma kuhakikisha wanashinda michezo yao miwili ya mwisho ili waende hatua ya mwisho ya kuwania tiketi ya Qatar mwakani.

Baada ya mechi dhidi ya DRC Dar es Salaam, Taifa Stars itasafiri kuifuata Madagascar kwa ajili ya mchezo wa mwisho wa Kundi J Novemba 14 Jijini Antananarivo.

Akizungumza kwa niaba ya wachezaji wenzake John Bocco amesema "Tunafahamu kuwa jukumu lililopo mbele yetu ni kubwa lakini nikuombe utufikishie salamu kwa Rais kuwa tupo tayari na tumejiandaa kwa mapambano"

Kwa sasa Taifa Stars inaongoza Kundi J kwa pointi zake saba ikiizidi wastani wa mabao Benin, wakifuatiwa na DRC pointi tano na Madagascar pointi tatu.

Ikumbukwe washindi wa makundi 10 watamenyana baina yao kupata wawakilishi watano wa Afrika kwenye fainali za Kombe la Dunia mwakani nchini Qatar 2022.