Waziri Junior uso kwa uso na waajiri wake wa zamani

Mshambuliaji mpya wa Dodoma Jiji FC Wazir Junior Shentembo, huenda akaanza kwenye mchezo wa Ligi Kuu Tanzania Bara dhidi ya Young Africans kesho Alhamis (Desemba 30).

Young Africans itakua mwenyeji wa mchezo huo utakaopigwa Uwanja Benjamin Mkapa wa jijini Dar es salaam, kuanzia mishale ya saa moja jioni.

Mshambuliaji Waziri Junior amekua sehemu ya wachezaji wa Dodoma Jiji FC waliofanya mazoezi ya mwisho leo Jumatano (Desemba 29), Uwanja wa Uhuru jijini Dar es salaam, kuelekea mchezo huo unaosubiriwa kwa hamu kubwa na mashabiki wa soka nchini.

Mshambuliaji huyo ambaye aliachwa kwenye usajili wa Young Africans mwanzoni mwa msimu huu, amesajiliwa Dodoma Jiji FC katika kipindi hiki cha dirisha Dogo la Usajili.

Dodoma Jiji FC itashuka dimbani kukabili Young Africans ikiwa na upepo mzuri wa matokeo, baada ya kuibanjua Namungo FC mabao 2-1, huku Young Africans wakiichapa Biashara United Mara mabao 2-1 mwishoni mwa juma lililopita.

Kwenye msimamo wa Ligi Kuu Dodoma Jiji FC ipo nafasi ya sita ikifikisha alama 16, huku Young Africans ikiendelea kuwa kileleni mwa msimamo huo kwa kumiliki alama 26.