Pascal Wawa
Beki wa zamani wa Simba anayekipiga Singida Big Stars, Pascal Wawa amekiri kikosi cha sasa cha Wekundu hao ni mziki mnene na walistahili kipigo kwani nyota wa timu hiyo ya Msimbazi walitumia vyema nafasi walizozipata kulinganisha na wao.
Singida ilifungwa mabao 3-1, huku Wawa akiwa nahodha na beki wa kati katika mechi kali iliyopigwa Uwanja wa Benjamin Mkapa, jijini Dar es Salaam.
Akizungumza beki huyo kutoka Ivory Coast aliyewahi kucheza El Merrekh na Azam FC, alisema katika mechi ya juzi ilijaa ufundi na mbinu, vitu alivyokiri vimechangia ugumu wa mchezo, hivyo wapinzani wao waliwazidi kwenye matumizi ya nafasi.
“Ni kweli SBS ni ngeni kwenye Ligi Kuu, lakini ina mastaa wazoefu na wenye vipaji, ambapo tumekutana na Simba yenye wachezaji wa aina hiyo, hilo ndilo lililofanya mechi iwe ya kiufundi zaidi,” alisema Wawa na kuongeza;
“Simba ilitumia nafasi na siku zote lazima apatikane mmoja anayeshinda ama kutoka sare, ndio maana hata kabla ya mechi nilisema hatuwabezi wapinzani wetu wana timu nzuri na wachezaji wake wanatumia akili zaidi.”
Wawa alisema kwa sasa hawana budi kuyasahau matokeo hayo na kuelekeza nguvu kwenye mchezo Februali 12 dhidi ya Ihefu, aliyokiri ina kikosi kizuri na chenye ushindani.
“Lazima tuangalie michezo ya kusaka pointi ambayo ipo mbele yetu, hivyo hatuwezi kuendelea kuugulia maumivu ya kufungwa na Simba, Ihefu ina timu nzuri na wachezaji ambao wana mbinu za kiuchezaji,” alisema.