Wachezaji wa Al Hilal waahidiwa mamilioni wakiipiga Madrid

Bilionea kutokea Saudi Arabia Prince Alwaleed bin Talal ameahidi kutoa zawadi ya dola za kimarekani 266,500 kwa kila mchezaji wa Al Hilal kwa ushindi wa magoli 3-2 dhidi ya mabingwa wa Amerika ya kusini Flamengo katika mechi iliyochezwa juzi ambayo imewawezesha kuingia kwenye fainali za Kombe la Dunia la klabu.

Prince Alwaleed ni Shabiki mkubwa wa klabu hiyo na kupitia mitandao ya kijamii ametangaza kutoa zawadi kama hiyo hiyo kwa mara nyingine ikiwa wachezaji hao watafanikiwa kushinda mechi ya fainali ifikapo Jumamosi.

Vilevile Saudi Sports Channel imeripoti kuwa kila mchezaji atapata dola za kimarekani takribani 133,000 kutoka kwa Waziri wa Michezo wa Saudi kwa ushindi wa juzi.

Hii ni mara ya kwanza kwa timu ya Saudi kufikia fainali za Kombe la Dunia la klabu na hatua hii imesheherekewa na Serikali kama ushindi mwingine mkubwa kwenye michezo baada ya timu yao ya taifa kuishinda Argentina wakati wa Kombe la Dunia nchini Qatar Novemba mwaka jana.