Wachezaji wa Simba wakipongezana baada ya Kibu kufunga Goli la ushindi
Mabingwa watetezi wa Kombe la Shirikisho la Azam (ASFC) Klabu ya Simba imeanza vyema michuano hiyo baada ya kuibuka na ushindi wa bao 1-0, dhidi ya JKT Tanzania katika Uwanja wa Benjamin Mkapa.
Bao la mshambuliaji Kibu Denis dakika ya 26, ya kipindi cha kwanza limetosha kuivusha timu hiyo kwenye hatua inayofuata.
Kipindi cha pili kilianza kwa timu zote kushambuliana kwa zamu ambapo Simba waliendelea kumiliki mpira kwa kiasi kikubwa.
Dakika ya 62, Simba ilifanya mabadiliko ya kumtoa mfungaji wa bao Kibu Denis na beki Israel Mwenda huku nafasi zao zikichukuliwa na Shomari Kapombe pamoja na Duncan Nyoni.
Mabadiliko hayo yalionekana kuleta tija kwa Simba katika kutengeneza mashambulizi kuanzia eneo la pembeni na katikati mwa uwanja.
Simba iliendelea kufanya mabadiliko ya kuwatoa Yusuph Mhilu, Osman Sakho na Peter Banda wakati nafasi zao zikichukuliwa na Jimmyson Mwanuke, Meddie Kagere na Ibrahim Ajibu.
Jitihada za JKT Tanzania hazikuweza kufaulu hivyo Kuwaacha mabingwa watetezi kutinga hatua inayofuata.