Eberechi Eze
Klabu za soka zinazohitaji huduma ya Eberechi Eze ni wakati wao sasa wakujipapasa mifukoni baada ya Crystal Palace kuweka hadharani bei anayoungwa mkali huyo wa kimataifa wa England.
Crystal Palace inakabiliwa na wakati mgumu kwenye dirisha hili la uhamisho wa majira ya kiangazi katika kuzuia nyota wake wasiondoke, ambapo ukimweka kando Eze, staa mwingine anayesakwa na vigogo wa huko Ulaya ni winga Michael Olise.
Tottenham mekuwa ikihusishwa sana na mpango wa kunasa saini ya Eze, 25, wakati Manchester City nayo ipo kwenye mbio hizo.
Wakati huo, Olise pia kitendo cha kukosekana kwenye Euro 2024 alipowekwa kando na Ufaransa, hakijashusha thamani yake sokoni.
Manchester United na Man City, sambamba na Liverpool, Arsenal na Chelsea, zote zimeripotiwa kuhitaji huduma ya winga huyo wa miaka 22.
Na sasa ripoti zinafichua kwamba ukihitaji saini ya Eze ni Pauni 60 milioni na nyongeza ya Pauni 8 milioni itakayolipwa baadaye kulingana na mafanikio yake ya uwanjani kama kinavyoelezea kipengele kwenye mkataba wake huko Palace.
Olise naye bei yake ni kwenye kiwango hicho hicho Pauni 60 milioni baada ya wawili hao kuisaidia Palace kufanya vizuri na kumaliza msimu wa Ligi Kuu England kweye nafasi ya 10 chini ya kocha Oliver Glasner.
Mastaa hao wawili wote mikataba yao itafika tamati 2027. Na kiungo mshambuliaji Eze thamani yake inaweza kupanda zaidi kama atafanya vizuri kwenye fainali za Euro 2024 huko Ujerumani. Spurs ndiyo timu inayoonekana kuwa siriazi kwenye kufukuzia huduma yake.
Eze kipaumbele chake kwa sasa ni kufanya vizuri kwenye michuano hiyo mikubwa, lakini kocha wa England, Gareth Southgate alisema hatawazuia wachezaji wake kwenye kufanya mazungumzo ya uhamisho kwenye kipindi hiki cha majira ya kiangazi huko Ulaya.