Mchezaji wa Zambia akijaribu kuwatoka wachezaji wa Twiga Stars
Timu ya taifa ya Tanzania ya Wanawake, "Twiga Stars" imetinga hatua fainali katika michuano ya COSAFA WOMEN CHAMPIONSHIP 2021 inayoendelea nchini Afrika Kusini.
Twiga imetinga hatua hiyo, kwa ushindi wa penati 3-2 mbele ya timu ya Zambia baada ya dakika 90 kukamilika kwa sare ya kufungana bao 1-1 kwenye mchezo uliochezwa Uwanja wa Nelson Mandela.
Mchezo huo ulikuwa na ushindani mkubwa kwa sababu timu zote zilikuwa hazijaruhusu nyavu zao kutikiswa wala kupoteza mchezo katika hatua za makundi.
Twiga Stars ilikuwa imefunga mabao 8 na katika nusu Fainali hiyo imepachika la 9 huku Zambia ikiwa ilikuwa imetupia mabao 9 na katika mchezo huo imetupia bao la 10.
Katika mashindano hayo yalishirikisha timu 12 ambapo tatu ni Tanzania, Uganda na Sudan Kusini ni wageni waalikwa.
Katika mchezo huo, mchezaji wa “Twiga Stars” Amina Bilal amechaguliwa kuwa mchezaji bora wa mchezo.
Ushindi huo unaipa nafasi Twiga Stars kutinga hatua ya fainali ambapo inamsubiri mshindi wa fainali ya pili kati ya Afrika Kusini na Malawi.