Tshabalala.
Beki wa Kushoto wa Simba SC, Mohamed Hussein ‘Tshabalala’ amesema wanashukuru kupata alama moja ugenini dhidi ya Asec Mimosas ila wanahamishia nguvu katika mchezo ujao dhidi ya Jwaneng Galaxy kuhakikisha wanashinda na kutinga Robo Fainali.
Simba SC ilitoka suluhu dhidi ya Asec Ijumaa (Februari 23) nchini Ivory Coast matokeo ambayo yana matumaini kidogo, lakini yakisubiri mchezo dhidi ya Jwaneng Galaxy ya Botswana kujua hatima yao.
Tshabalala amesema kwa sababu wako nyumbani mbele ya mashabilki wao kila kitu kinawezekana kwao kushinda.
“Tulikuwa ugenini na kila mtu anafahamu ubora wa Asec, lakini pia hakuna ambaye hafahamu ubora wetu, sare ni muhimu kwetu kwa sababu tuna mchezo mmoja nyumbani lazima tuhakikishe tunashinda kutinga Robo Fainali. Niwashukuru mashabiki wetu naamini kwa asilimia kubwa wametuombea dua,”
Amesema kilichobaki ni umoja wao kuhakikisha mchezo huo wa mwisho utakaochezwa Machi 2, kwenye Uwanja wa Benjamin Mkapa wanashinda.
“Tutaingia katika mchezo na Jwaneng Galaxy kwa kuwaheshimu na kufuata kile ambacho mwalimu atatuelekeza kupata matokeo chanya,” ameongeza
Matokeo hayo yanaifanya Simba SC kufikisha alama sita, huku Asec ikiwa kinara kwa alama 11 na kujihakikishia nafasi ya kwanza katika kundi lao.