David De Gea
Valencia imeungana na Real Betis kwenye mchakato wa kuiwania huduma ya kipa wa zamani wa Manchester United, David de Gea, 32, ambaye bado ni mchezaji huru hadi sasa. De Gea ambaye aliachana na Man United katika dirisha lililopita awali alikuwa akitajwa huenda angetimkia Saudia ama Bayern Munich lakini ilishindikana.
Staa huyu wa kimataifa wa Hispania anadaiwa ana asilimia nyingi za kutua timu moja kati ya hizo kwani moja ya vipaumbele vyake kwa sasa ni kucheza kwao ili kuwa karibu zaidi na familia yake.
Betis ndio ilikuwa ya kwanza kutajwa kuhitaji huduma ya kipa huyo, Valencia imeingia katika siku za hivi karibuni na kuongeza ushindani.
Hata hivyo, Betis chini ya Manuel Pellegrin ndiyo inayoonekana kuwa na nafasi kubwa ya kukamilisha dili hilo.
Betis haipo vizuri msimu huu ikishika nafasi ya 10 kwenye msimamo wa La Liga na moja ya maeneo yanayoonekana kuwa na udhaifu ni la kipa, ambalo De Gea anaweza kufiti.