Ten Hag aikataa Man United
Licha ya kupata ushindi wa bao 1-0 dhidi ya Brentford ikiwa ni siku kadhaa tangu apokee kichapo cha mabao 2-0 dhidi ya Newcastle United, kocha wa Manchester United Erik ten Hag amesema wachezaji wa timu hiyo wanatakiwa kubadilika zaidi ili kuiwezesha timu kufika mahali anapohitaji.
Ten Hag ambaye hapo awali baada ya kufungwa na Newcastle alisema wachezaji wa Man United wanatakiwa kutofanya makosa ya mara kwa mara ikiwa wanataka kufuzu kucheza Ligi ya Mabingwa, pia amesema kwenye mchezo wao dhidi ya Brentford ambao walishinda kwa lililofungwa na Marcus Rashford, walau timu ilionyesha hali ya kujitolea na kuonyesha kwamba wanapambana kuhakikisha wanapata ushindi.
Ten Hag anaamini bado anatakiwa kuipika timu hiyo zaidi ili kuhakikisha inafika kwenye levo kubwa za kuweza kushindana na timu kubwa zaidi.
Ushindi dhidi ya Brentford umeiwezesha Man United kuonja ladha ya ushindi wa Ligi Kuu England kwa mara ya kwanza tangu Februari 19.
“Kulikuwa na hali ya kupambana na shauku jambo ambalo hatukuwa nalo kwenye mechi iliyopita dhidi ya Newcastle lakini kwa sasa inaonekana kurudi, pindi unapopoteza umakini basi makosa lazima yatatokea, tunataka kucheza kama mashine na kutofanya makosa, kwenye mechi hii (dhidi ya Brentford) tulifanya makosa lakini bahati nzuri kwetu hawakuyatumia kutuadhibu,” alisema Ten Hag ambaye bado anaamini timu hiyo haijafika mahali ambapo yeye anatamani kufika.
Kwenye Ligi Kuu England kwa Man United kwa sasa inashika nafasi ya nne ikiwa na alama 53 baada ya kucheza mechi 28, ikishinda 16, sare tano na kufungwa saba.
“Hatujafika bado mahali ambako nahitaji tufike, tulichokionyesha Jumapili hakikubaliki kwa namna yoyote, ile haikuwa Man United na haikuwa aina yetu ya uchezaji, kuna aina ya ufikirivu ambao tunatakiwa tuwe nao muda wote wa mchezo na ikitokea wachezaji wawili au watatu watashindwa kufikiria kwa ufikirivu huo timu huwa kwenye matatizo.”
Ten Hag aliongezea kwamba bado anafanyia kazi upungufu kuhakikisha timu hiyo inakuwa bora kwa namna ambavyo yeye anahitaji.
Hadi sasa Man United ndio timu pekee iliyofanikiwa kuchukua taji kwa msimu huu ikiwa tayari ina kikombe cha Carabao ilichochukua baada ya kuishinda Newcastle United ikiwa ni kombe la kwanza la Ten Hag.
Lakini tangu ilipochukua kombe hilo imekuwa ikipitia wakati mgumu kwenye EPL ambapo iliwagharimu zaidi ya mwezi mmoja hadi kuja kupata ushindi wao wa kwanza.
Brenford ambayo imepoteza mechi hiyo ya juzi ni kati ya timu zinazopambana kuhakikisha zinafuzu kucheza michuano ya Ulaya kwa msimu ujao ikiwa ni Europa League ama Uefa Conference League kwa sasa ikiwa inashika nafasi ya tisa baada ya kukusanya alama 43.
United itarejea uwanjani Old Trafford kesho kuikabili Everton mapema saa 8:30 mchana.