Hassan Mwaterema
Umemsikia mshambuliaji wa Dodoma Jiji, Hassan Mwaterema? Jamaa amesema msimu huu anataka kiatu cha mfungaji bora.
Mwaterema ambaye msimu uliopita aliichezea Kagera Sugar tayari ameifungia klabu yake hiyo bao moja. Mpaka sasa Reliant Lusajo wa Namungo anaongoza akiwa na mabao matatu akifuatiwa na Moses Phiri (Simba), Fiston Mayele (Yanga), Tepsie Evance (Azam) na Matheo Antony (KMC) wenye mabao mawili.
Bao hilo la Mwaterema alilifunga akimalizia kazi nzuri ya Collins Opare katika mchezo dhidi ya Tanzania Prisons uliopigwa katika Uwanja wa Liti mjini Singida na kumalizika kwa Dodoma Jiji kuchapwa mabao 2-1.
Akizungumza na Mwanaspoti jijini hapa, Mwaterema alisema anayafurahia maisha ya Dodoma Jiji na ana imani msimu huu utakuwa mzuri kwake.
“Licha ya kuwa mfungaji bora nataka kuisaidia klabu yangu kupata matokeo na kuwa katika nafasi nzuri,,” alisema mshambuliaji huyo ambaye pia amewahi kuichezea timu ya JKT Tanzania.
Kocha wa Dodoma Jiji, Masoud Djuma alisema anataka timu yake itengeneze nafasi nyingi, hivyo anaamini Mwaterema atafunga sana msimu huu kwa kuwa ni mchezaji mzuri anayejituma.