Southgate aambiwa umemwona Palmer

Mashabiki wamewambia Gareth Southgate “tunatumai umetazama mechi” baada ya Cole Palmer kuweka rekodi ya kibabe kabisa kwenye Ligi Kuu England dhidi ya Newcastle United.

Kiungo huyo mchezeshaji amekuwa kwenye kiwango bora sana wakati timu yake ya Chelsea iliposhinda mabao 3-2 uwanjani Stamford Bridge usiku wa juzi Jumatatu.

Palmer alipiga asisti ya bao la kwanza lililowekwa kimiani na straika Nicolas Jackson. Na baada ya Newcastle kusawazisha kabla ya mapumziko, Palmer aliiweka Chelsea tena kwenye uongozi baada ya kufunga bao maridadi kabisa kwa mguu wa kushoto.

Palmer sasa amefunga mabao 11 kwenye ligi ikiwa ni msimu wake wa kwanza na kuasisti mara nane.

Hapo anaweka rekodi ya kuhusika kwa maana ya kufunga au kuasisti kwenye mechi nyingi za Ligi Kuu England kuliko mchezaji mwingine yeyote msimu huu, mechi tano.

Nahodha wa Tottenham, Son Heung-Min na fowadi wa Aston Villa, Ollie Watkins hao kila mmoja amehusika kwenye kufunga na kuasisti katika mechi nne, wakati winga wa Liverpool, Mo Salah na straika wa Man City, wamehusika kwenye kufunga na kuasisti mara moja katika mechi tatu za Ligi Kuu England msimu huu.

Mashabiki sasa wanaamini kocha mkuu wa England, Southgate - ambaye alikuwapo uwanjani Stamford Bridge aliona mavitu ya Palmer, hivyo anaweza kumjumuisha kwenye kikosi chake cha Euro 2024.

Shabiki wa kwanza alisema: “Southgate, namtumai umemwona kijana wangu Cole Palmer.”

Mwingine alisema: “Palmer amekuwa bora msimu wote, Southgate amemwona, atajifanya kipofu tena.”

Mwingine alisema: “Palmer anapaswa kuwamo kwenye kikosi cha England huko Euro, mchezaji wa aina yake, hata sielewi kwa nini Man City imemuuza.”

Shabiki mwingine alisema: “Palmer atashinda Ballon d’Or kama England itashinda Euro.”

Zaidi, Palmer ameingia kwenye tano bora ya mchango wa jumla wa mabao ya kufunga na kuasisti kwenye kikosi cha Chelsea kwa mikikimikiki ya Ligi Kuu England ikiwa ni msimu wake wa kwanza.

Kwa mabao 19 aliyohusika yamemfanya kulingana na Juan Mata, huku akiwa juu ya Alvaro Morata, Mark Stein na gwiji Gianfranco Zola. Yupo nyuma kwa bao moja kumfikia Eden Hazard na mabao mawili nyuma ya Cesc Fabregas.