Sochima Victor
Kipa wa Rivers United, Victor Sochima amesema kuwa, Kocha Mkuu wa Klabu ya Yanga, Nasreddine Nabi amempongeza kwa kiwango alichokionyesha wakati wa mchezo baina ya timu hizo mbili kwenye dimba la Mkapa juzi.
Sochima Victor amesema hayo wakati akihojiwa baada ya kumalizika kwa mchezo wa marudiano wa Robo fainali CAFCC uliotamatika kwa sare ya 0-0 na kufanya Rivers United kutupwa nje kwenye michuano hiyo.
"Baada ya mechi kumalizika, Kocha wa Yanga, Nabi aliniita na kunipongeza kwa mchezo mzuri na ameniambia anatamani ningekuwa kwenye timu yake.
"Sidhani kama Yanga ni timu imara sana lakini waliweza kutumia vyema nafasi na kupata matokeo kwenye mchezo wa kwanza na kuwapa faida. Sasa akili yetu tunaielekeza kwenye ligi ya nyumbani na tunaamini tutabeba taji".