Sio Simba, sio Azam ni Coastal peke yake Liti Singida

Mpaka sasa Coastal Union, ndio timu pekee iliyofanikiwa kuondoka na alama tatu katika Uwanja wa Liti mkoani Singida.

Alama hizo ilizipata Desemba 7 mwaka jana kwa ushindi wa mabao 2-1, tangu kipindi hicho hakuna timu yoyote iliyoweza kuifunga SBS katika uwanja huo.

Katika mchezo huo mabao ya Coastal Union yalifungwa na Emery Nimubona na Vicent Aboubakary huku lile la Singida Big Stars likifungwa na Deus Kaseke.

Timu hizo zinatarajiwa kukutana katika mchezo wa mzunguko wa pili Jumapili Machi 12, mwaka huu katika Uwanja wa Mkwakwani Jijini Tanga.

Singida Big Stars inashika nafasi ya nne kwenye msimamo ikiwa na alama 47 katika michezo 24 iliyocheza mpaka sasa huku Coastal ikishika nafasi ya 11 ikiwa na alama 25.

SBS imeshinda michezo 14, imefungwa mitano na kutoka sare mitano, wakati Coastal imeshinda sita, imefungwa 11 na kutoka sare saba.

Msemaji wa timu hiyo, Hussein Massanza alisema tayari wameanza maandalizi kuhakikisha wanapata matokeo katika mchezo huo.

Alisema wamejipanga kulipiza kisasi na kocha wa timu hiyo, Hans Van Plujim na benchi la ufundi wanauchukulia kwa tahadhari mchezo huo.