Kikosi cha Singida Big Stars
Ligi Kuu Bara inaendelea leo kwa mchezo mmoja kupigwa ambapo wenyeji Singida Big Stars itakuwa kwenye Uwanja wake wa nyambani wa CCM Liti mkoani Singida kupambana na wageni wao Mtibwa Sugar.
Singida inaingia katika mchezo huu wa mzunguko wa 24 ikiwa na kumbukumbu ya kupoteza mara ya mwisho ilipokutana na Mtibwa Oktoba 18 mwaka jana ilipofungwa kwa bao 1-0 la Charles Ilanfya.
Akizungumza na Mwanaspoti Kocha msaidizi wa Singida, Mathias Lule alisema wanatarajia mchezo mgumu ingawa wiki mbili za wao kutocheza zimetosha kabisa kurudisha morali ya timu kiujumla.
"Malengo yetu ni kumaliza nafasi nne za juu na ukiangalia hatujapata ushindi katika michezo yetu miwili mfululizo hivyo tunahitaji sana kurudisha morali ya timu kwa matokeo chanya."
Lule aliongeza wachezaji wote wako kwenye hali nzuri isipokuwa nyota na mfungaji wao bora Mbrazili, Bruno Gomes ambaye kuna uwezekano mdogo wa kucheza kutokana na majeraha aliyonayo ya misuli.
Kwa upande wa Kocha wa Mtibwa Sugar, Salum Mayanga alisema licha ya kumkosa mshambuliaji wake, Charles Ilanfya ila bado ana imani kubwa ya kufanya vizuri ingawa anatarajia ushindani mkali.
Ilanfya anakosekana leo baada ya kufungiwa michezo mitatu na faini ya Sh 500, 000 kwa kosa la kumpiga ngumi mchezaji wa Dodoma Jiji, Justine Bilaly wakati timu hizo zilipokutana Februari 11.
Singida iko nafasi ya nne na pointi 44 huku Mtibwa Sugar ikishika nafasi ya tisa na pointi 29, baada ya timu zote kucheza michezo 23.