Simu ya Fei Toto mshahara wa mtu

Achana sasa na masuala yote ya kimkataba kati ya kiungo Feisal Salum 'Fei Toto' na klabu ya Yanga, kubwa kwa sasa ni nyota huyo kumiliki simu ghali ambayo inamilikiwa na wachezaji wachache hasa wa ndani wanaocheza soka hapa nchini.

Fei baada ya kurejea nchini juzi Jumatano akitokea Dubai moja kwa moja alienda hadi kwao Zanzibar huku akiwa anamiliki simu mpya aina ya iPhone 14 Pro Max, ambayo bei yake kwa sasa nchini inauzwa Sh3.1 milioni.

Mchezaji huyo awali alikuwa anamiliki simu ya iPhone 13 Pro Max ambayo inauzwa Sh2,450,000 (milioni mbili na laki nne na nusu) ambayo baada ya kupata mpya, ile ya zamani amempa ndugu yake.

Mwanaspoti linafahamu kiungo huyo alienda hadi eneo la Darajani, Zanzibar kwa rafiki yake mmoja wa karibu ambaye anauza simu na alimpa simu hiyo kwa ajili ya kutoa mafaili kwenye simu yake ya zamani na kuweka kwenye simu mpya.

Rafiki wa karibu na Fei alisema mchezaji huyo huwa hana roho mbaya kwa watu wake aliotoka nao chini na ndio maana haoni ajabu kumpa ndugu yake simu yake ya zamani.

"Simu ambayo anamiliki kwa sasa ndio toleo la mwisho yaani jipya zaidi kwa upande wa iPhone, aliyogawa ndio ya pili kutoka mwisho, unaona kabisa ni mtu ambaye hana shida na watu wake wa karibu," alisema rafiki yake huyo