Simba waingia kambini kuwawinda Yanga SC

Wekundu wa Msimbazi Simba SC, leo Aprili 12, 2023, wanatarajia kuanza kambi kwa ajili ya mchezo wa dabi ya Yanga SC inayotarajia kupigwa Jumapili Aprili 16, 2023 katika Uwanja wa Benjamini Mkapa jijini Dar.

Akizungumza na waandishi wa habari, Afisa Habari wa Simba SC, Ahmed Ally amesema, wachezaji walirejea jana kutokea mkoani Mbeya walipokwenda kucheza mechi ya Ligi Kuu dhidi ya Ihefu, wakapewa mapumziko na leo asubuhi, wachezaji wote wanaingia kambini.

"Uzuri ni kwamba hatuna majeruhi, wachezaji wote wanaingia kambini. Mwalimu wetu Robertinho anayejua kucheza mechi hizi tunaye hivyo jukumu letu sisi kama mashabiki ni kununua tiketi mapema, kufika kwa wingi kupata furaha," alisema Ahmed.

Ahmed alisema, anatambua kwamba mechi hiyo kwao ni muhimu sana kushinda kwani wana takribani miaka mitatu hawajamfunga mtani kitu ambacho kwao si kizuri.