Simba wafanye wafanyavyo, Kila kitu kimalizike leo

Mpango wa Simba kwenye mechi za hatua ya makundi ya Ligi ya Mabingwa Afrika ulikuwa ni kupata alama tisa (9) kwenye uwanja wa Benjamin Mkapa!

Baada ya kupoteza alama tatu (3) mbele ya Raja Casablanca kwenye uwanja wa Benjamin Mkapa, ikawabidi kufidia kwa kulazimika kupata alama tatu (3) ugenini, wakafanikiwa kuzipata kwa Vipers waliocheza kwenye uwanja wa St. Mary’s, Uganda.

Kwa hiyo Simba bado wapo ndani ya mpango wao wa kufuzu Robo Fainali ya Ligi ya Mabingwa Afrika, mchezo wa leo [Simba vs Horoya] ndio utaamua waanze kusherekea kufuzu Robo Fainali au wasubiri hadi mechi ya mwisho dhidi ya Raja kule Morocco.

Na kwa kiwango ambacho Raja Casablanca wamekionesha kwenye hatua hii, bila shaka wachezaji wa Simba wapo tayari kufia uwanja wa Mkapa wapate alama tatu (3) kuliko kwenda kuzitafuta nyumbani kwa Raja Casablanca.

Hakuna timu ambayo imepata walau sare mbele ya Raja, kapiga timu zote nje na ndani! Na tayari imefuzu Robo Fainali na kuacha nafasi moja kwenye kundi ambayo inagombaniwa na Simba na Horoya.