Hassan Dilunga akijariny kuwatoka wachezaji wa Biashara United
"Wanajeshi wa Mpakani" klabu ya Biashara United wamewawekea ngumu mabingwa watetezi wa Ligi Kuu Tanzania, Bara Simba SC kuondoka na Pointi tatu katika dimba la Karume mjini Musoma, baada ya kulazimisha sare ya bila kufungana.
Katika mchezo huo ambao haukutawaliwa sana na ufundi pengine labda kwa sababu ya ubovu wa kiwanja , Simba hawakuonesha kile ambacho Mashabiki wao wamezoea kukiona katika mechi zao.
Simba wamecheza mechi yao ya kwanza msimuu huu mpya wa 2021/2022 na wameanza kwa kudondosha alama mbili.
Katika mchezo huo ilishuhudiwa Nahodha wa Simba John Rafael Bocco, akikosa mkwaju wa Penati dakika za lala salama za mchezo.
Hii ni mechi ya tatu mfululizo Simba wanakosa matokeo, kwani walicheza na TP Mazembe wakapoteza katika kilele cha Siku ya Simba Day, wakapoteza dhidi ya Yanga kwa goli 1-0 katika mchezo wa Ngao ya Jamii Jumamosi ya Septemba 25 na leo hii wamesuluhu katika mchezo wao wa kwanza Ligi Kuu Bara.
Matokeo hayo huenda yakaleta presha kwa Mwalimu wa Kikosi hicho Mfaransa Didier Gomes.
Katika mchezo mwingine wa Ligi kuu Tanzania Bara, timu ya Mbeya City imefanikiwa kuibuka na ushindi wa goli 1-0 dhidi ya Prisons, mfungaji wa goli akiwa ni Peter Mapunda 90+2'.