Simba kukipiga na JKU leo

Baada ya Kuichapa Kipanga mabao 3-0, Simba leo itaingia uwanjani tena kucheza mechi ya pili ya kirafiki dhidi ya JKU kutoka Zanzibar huku kocha mkuu wa klabu hiyo Oliveira Roberto ‘Robertinho’ akifichua siri ya mechi hizo.

Kipanga na JKU zote zinacheza Ligi Kuu Zanzibar zikiwa ni timu zinazomilikiwa na Jeshi ambapo Kipanga ni Jeshi la Anga huku JKU ikimilikiwa na Jeshi la Kujenga Uchumi Zanzibar, Robertinho akifunguka sababu za kucheza na timu hizo.

“Ni mechi ambazo niliomba mimi mwenyewe maalum kwa ajili ya kutafuta utimamu wa miili kwa wachezaji wangu baada ya ligi kuchezwa mechi mbili tu na kusimama, sitaki ligi ikirejea wachezaji waanze upya, hawa wapinzani ni wagumu, naamini watatupa mazoezi sahihi kabisa.”

“Tumecheza mechi mbili za ligi, licha na kuibuka na ushindi nimegundua kuwa timu yangu wachezaji hawapo sawa kimwili hivyo mechi dhidi ya timu hizi za jeshi ni sahihi sana kwasababu timu hizo zinacheza kwa nguvu na kasi.

“Mchezo uliopita uliniongezea kitu kwa wachezaji wangu, mfano nimepata nafasi ya kuwaona wachezaji wengine ambao sijawatumia kabisa kwenye mechi na wamenionyesha ubora walionao, hiki ndiyo kipimo sahihi kwetu,” alisema.