Simba kamili gado kuwavaa Wajeda leo

Kikosi cha Simba SC leo saa 10 jioni kitashuka katika Uwanja wa Meja Jenerali Michael Isamuhyo kilichopo Mbweni Dar es Salaam kuikabili JKT Tanzania katika mchezo wa Ligi Kuu ya NBC.

Simba itaingia katika mchezo wa leo wakiwa na kumbukumbu nzuri ya kupata ushindi kwenye mchezo wetu wa mwisho dhidi ya Geita Gold uliopigwa Uwanja wa CCM Kirumba.

Malengo ya Simba ni kuhakikisha wanashinda kila mchezo ulio mbele yao kwa kuwa wanahitaji kutwaa ubingwa wa Ligi msimu huu.

Mkakati wa Benchi la Ufundi

Kocha wa Makipa, Daniel Cadena amesema kikosi kipo tayari kwa ajili ya mchezo wa leo na wachezaji wote wapo kwenye hali nzuri.

Cadena amesema licha ya ratiba kuwa ngumu kutokana na kucheza mechi kila baada ya siku mbili, lakini wamejipanga vizuri kuhakikisha wanawapa furaha mashabiki kwa kupata pointi tatu.

“Tunajivunia kuwa na wachezaji bora ambao wanacheza kila baada ya siku mbili lakini wanapambana na kuhakikisha tunapata ushindi.” amesema Cadena.

Wachezaji wapo tayari kwa mchezo

Nahodha wa timu, Mohamed Hussein ‘Zimbwe Jr’ amesema wachezaji wanajua utakuwa mchezo mgumu lakini wamejipanga kuhakikisha wanashinda.

“Haitakuwa mechi rahisi, tunawajua JKT ni timu nzuri lakini tumejipanga na tutaingia kwenye mchezo wa kesho kwa lengo la kutafuta pointi tatu,” amesema Zimbwe Jr.

Ni mara ya kwanza kucheza Meja Jenerali Isamuhyo

Itakuwa mchezo wa kwanza kwa Simba kucheza Uwanja wa Meja Jenerali Michael Isamuhyo, kwa hiyo matokeo yoyote yatayo tokea itakuwa ni historia kwao.

Onana nje wiki moja

Katika mchezo wa leo, Simba wataendelea kumkosa kiungo mshambuliaji wao Willy Onana kutokana na kuuguza jeraha lake ambapo atakuwa nje kwa wiki moja zaidi ili kupona kabisa.