Simba, Yanga: turudi hapa

Baada ya kufanya kweli huko kimataifa, kwa sasa wadau wa soka nchini wanasubiri kushuhudia ‘Darby’ ya Kariakoo baina ya Simba na Yanga, huku mashabiki wa timu hizo wakisema ‘tukutane kwa Mkapa’ kujua nani mbabe.

Hadi sasa Yanga ndio kinara kwenye ligi kuu kwa pointi 65, huku Simba wakiwa wamekusanya alama 57 baada ya kucheza mechi 25 na kufanya mpambano huo kuwa mkali.

Manase Buchumi mwanachama na shabiki wa Yanga tawi la Nzovwe jijini hapa alisema mchezo huo wanautamani sana na moto ilionao timu yao lazima washinde ili kuanza sherehe za ubingwa.

“Tunatarajia kuondoka Mbeya Aprili 14 kwa lengo la kwenda kushangilia timu yetu, ni mchezo muhimu sana kwetu kwani ushindi utatupa mwanga na urahisi wa kutangaza ubingwa msimu wa pili mfululizo,” alisema Buchumi.

Naye Mwenyekiti wa Simba Mkoa wa Mbeya, Abel Edson alisema kwa Mkapa hapatatosha akisisitiza kuwa lazima kieleweke na Wekundu washinde akiwaita mashabiki kujaa kwa wingi.

“Tumeanza mipango ya safari kwa mashabiki na wanachama wa Simba Mbeya, tunatarajia kuondoka siku moja kabla ya mechi, tunahitaji ushindi kwa hali yoyote, tunasema tukutane kwa Mkapa,” alisema Edson.