Simba Queens yaurudisha mtambo wa mabao

Simba Queens hawatanii. Msimu huu ni wazi kabisa wanaitaka ndoo ya Ligi Kuu ya wanawake na imemrudisha straika wa zamani wa timu hiyo, Jentrix Shikangwa akitokea nchini China.

Mwanaspoti linafahamu kwamba tayari Mkenya huyo yupo nchini akichukua kandarasi ya miaka miwili na muda wowote kuanzia sasa atatambulishwa.

Shikangwa msimu uliopita alikuwa na kiwango bora na ndiye aliyeibuka na tuzo ya ufungaji bora akitupia kambani mabao 19 kwenye mechi 15.

Mchezaji huyo alijiunga na Simba mwaka 2022 kwa mkataba wa mwaka mmoja akitokea Harambee Starlets na baada ya kufanya vizuri na kumalizana na wanamsimbazi hao mwaka jana akajiunga na Beijing Professional FC ya nchini China.

Wakati Simba inamrudisha Mkenya huyo inadaiwa kiungo mshambuliaji, Jackline Albert ametolewa kwa mkopo kwenda Fountain Gate Princess ili kumpisha Shikangwa.

Alipotafutwa meneja wa timu hiyo, Selemani Makanya kuhusu ujio wa mshambuliaji huyo alisema: "Tetesi zimekuwa nyingi kwenye dirisha la usajili nadhani kama jambo lipo mtaliona."