Nahodha wa Simba, John Bocco akijaribu kusaka goli dhidi ya Jwaneng
Wawakilishi wa Tanzania kunako Michuano ya Ligi ya Mabingwa Afrika, timu ya Simba Sports Club imetolewa katika mashindano ya Klabu Bingwa baada ya kukubali kichapo cha magoli 3-1 kutoka kwa Jwaneng Galaxy ya nchini Botswana.
Katika mchezo huo ambao umepigwa kwa Mkapa Jijini Dar es Salaam, umeshuhudia Simba wakipata matokeo ya kushangaza kutokana na rekodi zao katika uwanja huo.
Simba walioanza mchezo huo kwa kasi walipata uongozi kipindi cha kwanza baada ya kiungo wake Rally Bwalya kufunga bao dakika ya 40 na kuwafanya kwenda mapumziko wakiwa wanaongoza 1-0.
Kipindi cha pili Jwaneng walirekebisa makosa yao na kupata magoli mawili ya haraka haraka yaliyofungwa na Wendell 46', 59' kabla ya Mohutsiwa kuongeza bao la tatu dakika ya 86'.
Walinzi wa Simba walionekana kufanya makosa ya kizembe yaliyopelekea kufungwa kwa magoli mawili ya mwanzo.
Kwa matokeo hayo Simba inakwenda kushiriki Kombe la Shirikisho Afrika ambayo ratiba ya mechi zake itapangwa jumanne wiki ijayo.