Shughuli ya Banda imeishia hapa Simba?

Peter Banda alikuwa anavaa jezi namba 11 baada ya jezi hiyo kuachwa na Luis Miquissone, alivyorejea Miquissone akachukua jezi namba 10 ambayo alikuwa anavaa Pape Osmane Sakho.

Baada ya muda Miquissone alionekana na jezi namba 11, inawezekana alimuomba Banda nae hakukunja akampatia. Ni jambo la kawaida kwenye mchezo wa soka.

Siku ya utambulisho wa wachezaji kwa ajili ya msimu 2023|24, Banda alitambulishwa akiwa amevaa jezi namba 40 ambayo ndio angeitumia kwa msimu huu.

Hivi karibuni baada ya Simba kumtambulisha golikipa mpya Ayoub Lakred kutoka Morocco, nyanda huyo ameonekana akiwa jezi namba 40! Ambayo Banda alikuwa akiitumia.

Taarifa za ndani zinasema Banda shughuli yake ndani ya Simba ndio imeishia hapo! Jina lake limekatwa ili kumpisha golikipa mpya. Awali jina lake pia lilikuwa lipigwe panga lakini baada ya Simba kuachana na golikipa raia wa Brazil, Banda akapona!

Ushahidi mwingine ni orodha ya majina ya wachezaji wa kigeni walioombewa vibali na Simba iliyowasikishwa TTF, Simba tayari imetuma vibali vya wachezaji 11 wa kigeni walioombewa vibali huku jina la Peter Banda likiwa halipo.

Kwa maana hiyo, PETER BANDA si sehemu ya kikosi cha Simba licha ya kutambulishwa kwenye tamasha la Simba Day! Nafasi yake inachukuliwa na golikipa Ayoub Lakred.