TanzaniaWeb
Dar es Salaam. Mahakama ya Hakimu Mkazi Kisutu, leo Jumanne, Desemba 18, 2018 , imeshindwa kuendelea kusikiliza ushahidi katika kesi ya kujipatia fedha kwa njia ya udanganyifu na utakatishaji wa fedha wa dola za Marekani 173,335 na Sh 43,100,000, inayomkabili aliyekuwa Rais wa shirikisho hilo, Jamal Malinzi na wenzake wanne.
Kesi hiyo imeshindwa kuendelea baada ya shahidi wa 10 kutofika mahakamani kwa kile kilichodaiwa ana matatizo ya kifamilia, tayari mashahidi tisa wa upande wa mashtaka wameshatoa ushahidi wao dhidi ya washtakiwa hao.
Mwendesha Mashtaka wa Takukuru, Leonard Swai ameieleza Mahakama ya Hakimu Mkazi Kisutu mbele ya Hakimu Mkazi Mkuu, Wilbard Mashauri kuwa kesi hiyo imekuja kwa ajili ya kuendelea na ushahidi lakini shahidi tuliyemuandaa amepata matatizo ya kifamilia.
Wakili wa utetezi Abrahamu Senguji alidai kuwa upande wa mashtaka umeshindwa kuandaa mashahidi hivyo walitakiwa kuandaa shahidi zaidi ya mmoja.
"Rekodi za Mahakama ziliutaka upande wa Mashtaka kuleta mashahidi watatu, sisi upande utetezi tunasema upande wa mashtaka wameshindwa kuandaa shahidi tunaona hawana nia ya kuendelea na kesi hii hivyo Mahakama inaweza kuiondoa kesi hii na kuwaachia huru"alidai wakili Senguji.
Baada ya kuelezwa hayo Hakimu Mashauri alikubaliana na upande wa mshtaka na kuahirisha kesi hiyo hadi Januari 2 na kusikilizwa kwa mfululizo Januari 16, 17 na 21, 2019 huku akiutaka upande wa mashtaka kuandaa Mashahidi.
Mbali na Malinzi, washitakiwa wengine katika kesi hiyo ni Katibu Mkuu wa TFF, Mwesigwa Selestine(46) na Mhasibu wa TFF, Nsiande Mwanga (27).
Wengine ni Meneja wa Ofisi TFF, Miriam Zayumba na Karani wa TFF, Flora Rauya ambao kwa pamoja wanakabiliwa na mashitaka 30 katika kesi ya jinai namba 213 ya mwaka 2017 yakiwamo ya kula njama, kughushi, kujipatia fedha kwa njia ya udanganyifu na utakatishaji wa fedha wa dola za Marekani 173,335 na Sh 43,100,000.